Ғазодаги хунрезлик авжига чиқди: Исроил аскарлари яна тинч аҳолини ўққа тутди
Озиқ-овқат ғамида келган афтодаҳол фаластинликлардан камида 50 киши ҳалок бўлиб, 250 нафари яраланган.
Ғазо шаҳрида кеча, 29 февраль куни инсонийлик ёрдами олиш учун навбатда турган ўнлаб кишининг Исроил ҳужуми оқибатида ҳалок бўлгани тўғрисида Associated Press агентлиги хабар тарқатди.
Агентлик Исроил ҳужумлари натижасида ярадор ва хасталар учун қабристонга айланган машҳур “Аш-Шифа” касалхонаси ходимларидан олган маълумотларга таяниб, камида 50 кишининг ҳалок бўлгани ва 250 киши яраланганини билдирди.
Воқеа жойига яқинроқ бўлган “Камол Адвон” касалхонасига ҳалок бўлган 10 киши ва яраланган 160 киши олиб келинган. “Ал Ауда” касалхонасига етказилганлардан уч киши ўлган, 90 киши турли даражада жароҳатлар олгани маълум бўлган.
Исроил бу хабарга ҳозирча муносабат билдирмади. Ўтган 4 ой мобайнида Исроил аскарлари тинч аҳоли жойлашган кўча ва маҳаллаларни тинимсиз ўққа тутиб келади.
Ғазонинг ҲАМАС (Ислом қаршилик кўрсатиш ҳаракати) маъмуриятига қарашли Соғлиқни сақлаш вазирлиги шу кунгача 30 мингга яқин тинч аҳоли ҳалок бўлганини билдирган.
ҲАМАС 2023-йилнинг 7-октябрида тўсатдан Исроил ҳудудига ҳужум қилиб, унга катта талофат етказган. Исроил ҳукумати расман аввалига 1500, кейин 1300 ва охири 1200 кишининг ўлдирилгани ва 250 нафарга яқин одамнинг гаровга олинганини билдирган.
Шундан сўнг Исроил 2,5 миллион тинч аҳоли яшайдиган Ғазо ҳудудида ҳарбий амалиёт деб аталган тўлақонли қирғинни бошлаган эди. Ўшанда Исроил бош вазири Нетаняху ва мудофаа вазири Галант фаластинликларни “ҳайвонлар”, “ёввойилар” деган аташган.
Дунёнинг қатор давлатлари Исроилнинг Ғазода тинч аҳолини қираётганини кескин қоралаб, буни геноцид сифатида баҳоламоқда. Аҳолиси асосан насронийлар бўлган Жанубий Африка Республикаси Исроилни геноцидда айблаб, БМТнинг Халқаро судига мурожаат қилган. Судда бу даъвони қўллаб, ўнлаб мамлакат вакиллари иштирок этишмоқда. Германия ва Франция каби айрим давлатлар Исроилнинг тарафини олишмоқда.
Ҳатто яҳудийлар давлатини ўз боласидек эркалатиб, йилига миллиардлаб доллар қайтаримсиз ёрдам бериб келаётган АҚШ ҳам охири Исроил ҳукуматидан бу қатлиомни тўхтатишни талаб қилишга мажбур бўлмоқда. Шу вақтнинг ўзида Америка бу давлатни ҳар томонлама қўллаб-қувватлашда давом этмоқда.
Исроил ҳукумати ўзига қўйилган айбловларни сурбетларча рад этиб, ҲАМАСнинг тинч аҳолини тирик қалқон сифатида қўллаётганликда айбламоқда.
Саудия, Миср, Қатар ва АҚШ иштирокида давом этаётган музокараларда оташкесим ва гаровга олинганларни қайтариш масаласи муҳокама қилинмоқда. АҚШ президенти Жо Байден 26 февралда келаси ҳафтанинг бошида бу борада келишувига эришиши мумкин эканини билдирган эди. Аммо ҲАМАС ҳам, Исроил ҳам буни рад этишди.
ҲАМАС урушни тўла тўхтатишни, Исроил эса вақтинча тўхтатиб туришни ва гаровга олинганларни тўла озод қилишни талаб қилмоқда. Исроил талаби бажарилган ҳолатда унинг қўшинлари ҳеч нарсага қарамай, Ғазонинг тўла кулини кўкка совуриши тайин.
Яҳудийлар давлатининг асл мақсади – ҲАМАСни тўла йўқ қилиб, Фаластин ерида ўзининг тўла ҳукмронлигини ўрнатиш ва ҳудуддан фаластинликларни ҳайдаб чиқариб, уларнинг ерларида яҳудийларни жойлаштиришдан иборат экани аниқ бўлиб қолди. Ҳозирча ҲАМАСнинг қўлида асирларнинг борлиги уни бу хунрезликдан тўхтатиб турибди.
Оқбура, Бишкек.
Сурат интернетдан олинди
